Boanmau

BOANMA AU
Inang…, inang na burju,
Inang…, inang na uli lagu,
Aha ma si dohononku,
Tu ise ma nama aluhononhu

Molo marsak ahu,
Molo ponjot pingkiranku…

Inang … Inang na basa
Nunga ganjang dalan talaosi
Galumbang ni aek tao-toba,
Suang songoni haba-haba ni Haranggaol
Laho manguduti ngalo siapari…

Inang …
Tasuruk udan dohot las ni ari,
Mulai sian Sihotang tu Simbolon,
Sian Tigaras rodi Perbaungan
Tadalani borngin sian Sungai Buluh tu Bengkel,
Tabolus langlang di Matapao sahat tu Lubuk Pakam
Laho patupahon asa tuk ngolu-ngolu ni sude anakkonmu.

Inang … Inang nadenggan basa
Ditaon ho martaon di luat si leban,
Holan manghokkop sude hami anakkonmu,
Didokho, “Anakkon hido hamoraon di Ahu”

e tahe, burju mi inang!
e tahe, denggan ni lagu mi inang!

Di ngolum dang manarita ho tu pangalaho nami sude anakkonmu…

Sai dianju ho do …
Sai diajari ho do …
Sai diampok ho do atem-atem
Parbahul-bahul na bolon do ho inang,
Dang diolom ho pangalaho ni sude hami anakkonmu …

Saonari ikkon borhat ma ho, mangalusi jou-jou ni Amanta Debata …

Ah tahe …,
Di naso panagaman, boasa?
Boasa inang na burju
Ingkon laho ho maninggalhon ahu,

Ise nama mangapus ilukku molo tangis ahu,
Ise nama manggolom simajujungku molo tok ulungku,
Tu isema hasampean ni langkakku,

Ah tahe inang, inang na burju…
Boan, boanma ahu inang tu hasonangan i
Boan, boan ma au inang rap dohot ho manjumpangi Tuhan i…
Rap ma hita tu surgo i,songon rampakta manaon na porsuk di hasiangan on …

Inang, begema ahu inang,
Tangihon ahu inang, anakmu na lungun on…
Hujalo podami,
Hujalo sipasingotmi atik pe mangaruhut di lakkakki,

Inang…
Molo ingkon laho ma ho saonari tu hasonangan i,
Ingot ahu da…!Hatop ahu jou tu lambung mi,
Parade dalan di ahu do hot sude hasonangan di Surgo i.
Borhat, borhat ma ho, inokku na burju.

(Untuk Inangku,27 Februari 2004,di Lumban Siagian Pangururan Samosir sebelum diberangkatkan ke pemakaman, di Tano Ponggol)